[Ivan Leung] 新年。萬象。更新

新一年,新開始。你預計嘅,未必來臨。

你知道,方便嘅極致,就係唔太方便。好似用唔夠錢嘅八達通卡入唔到停車場,用開payme同微信錢包嘅當你無帶電話果陣時,錢都比唔到。

當你將所有野放晒係一個工具裡面,風險極度集中,一有事,咩都無晒。所以,就算滿倉都好,你個portfilio一定要夠balance,咩都有啲,好似上年啲ICO死左,你都仲有啲股票、基金、物業呀,其他野頂住,識埋期權仲好,勝算仲高。如果股票、基金、物業都死左,起碼都仲有實業或者工作頂住。無都唔緊要,就算輸咩都好,最重要嘅唔好輸左健康、信心同謀略,如果唔係,好難東山再起。

你知道,做人,商業上、感情上,做個有骨氣嘅人,都係無用嘅。 風險唔識轉移,都係無用嘅。范冰冰事件啟示你,國家知很多,錢要留國內,稅要交足,人要低調,後台不靠譜,人在江湖身不由己,錢非你錢,你只係人頭代收,將來,必需必須必要時,係一定要還嘅。馬雲退休,華為被搞,安邦消失,小米唔掂,都可能係以前透支過度,所以宜家要還嘅。

現在,世界大亂,中美大戰,大敵當前,抄家容易,罰錢容易,企業倒閉容易,一無所有容易,偏偏就係「成功」呢樣野,唔容易。因為,宜家嘅「成功」,定義同以前唔同晒嘞:以前「成功」=成功,宜家「成功」=仲未失敗/開始失敗。在中東有人明刀明槍走入去一個國家嘅大使館殺人,無事。在香港有人明刀明槍殺左自己老婆,坐兩年。有總統一唔鍾意就可以容許唔出糧比政府員工,有政府一唔開心就拉其人國家嘅市民入罪。誰大誰惡誰正確。有上市公司員工刻意出糧比自己家人幾年間出多左成百倍人工賺多左幾千萬,有罪。但有更多上市公司股東將公司嘅正野賣比/轉讓比自己名下、或者公司比錢高溢價租用股東個人名義嘅鋪位,合法。雖然,目的都係大同小異,但係,結果差之千里。宜家講成功,就係將「要還」嘅時辰推遲,推到你唔在位果時,你就係成功。

以前,成功只需要一次。現代嘅成功,係需要多次。宜家企業家講企業家精神,係要連續創業,仲要賣得出,所以要二次、三次、多次創業,才算成功。以前有興趣創業嘅人會問「你做生意有咩心得?」、「生意概念來自咩啟法呀?」、「點運作呀?」。宜家,會問「你融資有咩心得?」、「做第幾輪呀?」、「諗住幾時exit呀?」。所以,賣得出愈多ideas、融得到愈多輪、exit得到愈多business,就叫「成功」。

以前,人一生,只需要做好一單deal、一個代表作,就可以了。一個演員一套戲,一個歌手一首歌,一位企業家一個生意,一個人一個伴侶。現代世界,推陳出新,sales cycle愈來愈短,感受愈來愈輕,觸動人心嘅事愈來愈便宜,震撼力愈來愈輕。演唱會幕幕都精彩無悶場,個個位都係高潮無低谷,首首都係金曲無唔好聽嘅,間間企業都係旗艦無虧本嘅,件件產品都係最佳無次貨嘅,你信嘛?

新一年,好多意想唔到嘅事會來臨,睇吓點。