[Ivan Leung] 問題。天天都多

有時,人最大嘅問題,係唔夠自信同唔夠自律。

做投資,無自信嘅,分析完一大輪之後永遠都唔會肯買野;而無自律嘅,就永遠都唔會理出面係咪立立亂都會係咁買野賣野,亦唔會set止賺止蝕位,或者set左但點都唔會跟隨。做運動,無自信嘅無論大好機會wide open無人守嘅中距離你都係唔會肯投籃、抬上面有個半chance機會嘅hard shot黑柴你係點都唔會肯打、左手邊線無人推落底你都只會cup停後傳永無推大位射波;而更大獲嘅係,無自律嘅你次次玩完之後,宵夜都係去食打冷、雞煲,飲藍妹又睇骨妹,返到屋企你老婆問你做咩野運動,搞到成兩點幾先識死返嚟,下次都係唔放畀你去做運動嘞。你好唔開心,下次見到阿明阿基,問起你點解果日明明歐聯約左一齊睇,點解放飛機呀?你唔通話,上次因為返屋企遲左所以被老婆restricted左人身自由咩?無自信、無自律嘅後果,係好多時連自重都無埋,無左自我尊重,就連帶個結果都被影響埋。

無論你做得幾好幾差、幾盡心用力或者有幾hea都好,世界總會有人likebuy你,果種鍾意,亦會衍生出hater或者大量hatersssss嘅存在。大帝James可能係MJ年代之後近年最堅勁揪嘅nba球星、誠哥可能係本地最有國際視野同政治觸角嘅一代商家、C朗美斯係近年嚟最有競爭力同主宰比賽能力嘅足球員、Donald Trump係美國優先政策最忠實嘅執行者、黃子華係近十幾廿年將stand-up comedy通俗化地道化最成功嘅一位表演者,佢地一樣會有hatersss,甚至乎連群結黨嘅攻擊、鋪天蓋地嘅謾罵、與事實未必相符而又情緒化嘅批判。

到果陣時,你可能會質疑、懷疑自己嘅能力,信心開始動搖。當然,你亦可以繼續死頂,直到情況改善為止。有一次,幾年前,我做左功課,分析左一個行業,睇好呢行其中一間幾有份量嘅公司,當時佢$4.2我買左一大注,之後,行業負面新聞不停嚟,不過,我認為公司基本面唔單止無變,仲應該會愈來愈好,發展愈來愈穩定,於是趁佢$3.2果陣,入多一注,將平均成本拉到$3.66,而其間呢個時期,仲收左兩次加埋成2毫子嘅股息。之後,一年之後,佢開始開車嘞,一路升,爆到去九蚊左右就回氣,我驚青嘞,於是$8.8$8.92全部賣晒。可惜,回完之後,佢繼續去,爆到去差唔多$19先識停,宜加都係十零蚊上落。未睇最終結果果陣,我為自己睇中投資獲利而充滿信心;但當睇到最尾嘅結果,我卻為自己掌握唔到最好timing少左成十蚊嘅出貨機會而失去信心。另一次,近排嘅,2017年,新經濟股當炒,其中有條蛇,IPO果陣時有些少微甜頭,所以,佢回到差唔多果陣,我就入左貨嘞……結果?大家知,心照,心知不妙,心如刀割。陳奕迅有首歌,cry in the party,再接下來就要收拾了。我呢?就crying in the market,總有段情,落入這種困局。

無錯,人最大嘅問題,就係唔夠自信同唔夠自律。但係,當你太有自信果陣時,就會變左自負;而沉迷自信嘅結果,就係會唔記得左自律——對自我的紀律。失敗嘅禍根,就果刻開始種下嘞。咁點樣平衡呢?就係,間唔中要中吓招,訓練吓反應,提醒吓自己,無論幾成功都好,自己唔係神唔係king,歐聯三年霸都好但係西甲始終差啲,東岸點勁都好但係西岸有隊野叫勇士頂住晒,國內點強勢都好出面有個霸權叫美國壓住晒,2017年超級順利但過完2018Q1你先發覺原來輸係唔可怕,贏完先輸都唔可怕,贏完輸突然後信心盡失企唔返身先大獲呀!

2018-06-03

Ivan Leung – 喜歡音樂、教學培訓、投資、寫文章,熱愛探索新事物,保留著對世界的好奇心。

https://www.moneykol.com/?author=75

https://www.facebook.com/mcivanleung/

http://www.yes-news.com/?p=thepeople&blogid=294

https://medium.com/@ivanleung_25409