[Ivan Leung] 騙不過。瞞不透

「手段」同「目的」,係唔同。

國與國之間,制裁係手段、trade war係手段、口誅筆伐係手段、導彈飛來飛去係手段、告來告去都係手段,目的係攞著數,同想令對方有損失、削弱對方實力,係談判籌碼。男同女之間,打電話比你、向你撒嬌、成日想你陪、日日IG放閃、送禮、帶你比親友見面,全部都係手段,目的係想長期佔有你control你入侵你生活,話比人地知你只係屬於佢一個嘅,宣示主權實力。公司內部唔同部門之間,你唔肯放人、我唔肯放數、你唔肯同個客交代清楚、我係BOD個會度滲啲衰野出嚟隊你,你又搞啲小動作想拆散我條team啲人,我又匿名寄信比某機構去舉報你,呢啲全部都係手段,目的係想整死你之後,可以代替你攞最大嘅權力同利益,為自己,可以話係天經地義。

你分唔分得清,究竟賺錢係「手段」定「目的」?拍拖結婚係「手段」定「目的」?生仔係「手段」定「目的」?買樓係「手段」定「目的」?你一步步走、一步步行過你嘅人生,究竟咩係「手段」咩係「目的」,你清唔清楚?

為單deal,你可以去得幾盡?剛剛先同你,坐左係佐敦澳牛傾左唔夠兩句,你已經趕住要跑過去童軍中心果邊坐大巴返順德。你專登住係九龍站上面,唔係貪佢個屋苑有咩好,夠elite,反正,好極都唔夠你大陸果間house靚架啦;而係,地點近中港城碼頭坐船、近機鐵去機場,同埋,將來近高鐵站坐火車去廣州。對於成日要返大陸嘅你,連住邊,都要諗吓度過先揀。究竟,見客係「手段」定係「目的」呢?

為左放底單身呢個身份上嘅包袱,你好努力,想令自己變得吸引啲。例如,你去做gym搵PT,操到自己睇落muscular啲;你減少左打機同睇波,多左時間去做吓義工返吓教會,接觸吓唔同類型嘅人,想令自己生活充實啲。點知,次次當你見到鍾意嘅女神,date左一、兩次之後都無左下文,你開始明白,有啲野唔係你話想爭取就可以有。雖然,你唔太喜歡用左右手,又唔想成日book ptgf,不過,都係無辦法啦。究竟,追求愛係「手段」定係「目的」呢?

BB最叻係咩吖?食訓屙喊。

女人最叻係咩吖?買野扮靚講野吹是非感受。

男人最叻係咩吖?搵靚女扮野講野吹水吹噓。

生意人最叻係咩吖?8+1 talk。

角色扮演遊戲,玩玩吓,以為真,感覺卻又似假,唔知點適應,面對呢個自己。

 

2018-05-29

Ivan Leung – 喜歡音樂、教學培訓、投資、寫文章,熱愛探索新事物,保留著對世界的好奇心。

https://www.moneykol.com/?author=75

https://www.facebook.com/mcivanleung/

http://www.yes-news.com/?p=thepeople&blogid=294

https://medium.com/@ivanleung_25409